ସ୍ୱପ୍ନା ମିଶ୍ର କେଉଁ ପରି ପୃଥିବୀର ସ୍ୱପ୍ନ ଦେଖିବାକୁ ପସନ୍ଦ କରନ୍ତି ?
ନା, ମୁଁ ସ୍ୱପ୍ନ ଦେଖେନି ଦୁଃଖ ,ଯନ୍ତ୍ରଣା ,ବେକାରୀ,ଗରିବ, ଉଚ୍ଚନୀଚ ଭେଦଭାବହୀନ ପୃଥିବୀ ଟେ ସତରେ ଚାହେଁ ।
ବିଶେଷ କରି କବିତା ଓ ସାମଗ୍ରିକ ରୂପେ ସାହିତ୍ୟ ବ୍ୟକ୍ତି ଜୀବନକୁ କଣ ଦେଇଛନ୍ତି ?
କିଛି ବି ଦେଇ ପାରିନି ବୋଲି ଅନୁତାପ କରେ। ମୋର ସାମର୍ଥ୍ୟ ବୋଧେ ସେତିକି ସୀମିତ ବୋଲି ଭାବି ମନକୁ ବୁଝେଇ ଦିଏ ।
‘ଭାଗବତ ‘ କୁ ନେଇ ଗବେଷଣା କରିଛନ୍ତି । ଗବେଷଣା ବେଳର ଅନୁଭୂତି ସଂକ୍ଷେପରେ କୁହନ୍ତୁ ।
ହଁ, ୨୦୦୪ ମସିହାରେ ଗାଁ ପାଖରୁ କିଛି ପୁରୁଣା ତାଳପତ୍ର ପୋଥି ସଂଗ୍ରହ କରିଥିଲି।ପୁରୀର ଦେବଦତ୍ତ ମିଶ୍ରଙ୍କ ପାଖରୁ କିଛି ଲେଖା ସଂଗ୍ରହ କରିବା ସହ ପୁସ୍ତକ ଆକାରରେ ପ୍ରକାଶିତ ବିଭିନ୍ନ ଭାଗବତ, କଥା ଭାଗବତ ଆଦିକୁ ଧରି କାମ କରିଥିଲି ।
ଗଳ୍ପ,କବିତା ଓ ଉପନ୍ୟାସ ଲେଖିଲାବେଳେ କେଉଁଟି ନିଜକୁ ଅଧିକ ସହଜ ମନେ ହୁଏ ?
ପ୍ରକୃତରେ ଭଲ ଗପ ହେଉ ,କବିତା ହେଉ ବା ଉପନ୍ୟାସ ଭଲ ଲେଖାଟିଏ ଲେଖିବା ଆଦୌ ସହଜ ନୁହେଁ।
ନାରୀବାଦ ବାବଦରେ ମତ କଣ ରଖିବାକୁ ଚାହିଁବେ?
ପ୍ରାକୃତିକ ବିଭାଜନକୁ ଛାଡିଦେଲେ ନାରୀ ପୁରୁଷ ଭିତରେ ଥିବା ଅନ୍ୟ ଯେକୌଣସି ବୈଷମ୍ୟ ବିରୁଦ୍ଧରେ ପ୍ରତିବାଦ ହେଉଛି ନାରୀବାଦ।
ଏକବିଂଶ ଶତାବ୍ଦୀର ଓଡ଼ିଆ କବିତା ବିଷୟରେ ମତ କଣ ରହିବ ଆପଣଙ୍କର ?
ଏକବିଂଶ ଶତାବ୍ଦୀର କବିମାନେ ବିଶେଷ କରି ନୂଆ ପ୍ରତିଭା ମାନେ ବେଶ ପରିପକ୍ୱ ।
ପଶ୍ଚିମ ଓଡ଼ିଶାରେ ବେଶ ସମୟ ବିତେଇଛନ୍ତି ।ଏ ରହଣି ଜୀବନ ଓ ସାହିତ୍ୟ ଉପରେ କି ପ୍ରଭାବ ପକାଇଛି ?
ମୁଁ ପଶ୍ଚିମ ଓଡ଼ିଶାର ମଣିଷ,ତାର ସାଂସ୍କୃତିକ ,ସାମାଜିକ ଜୀବନକୁ ବେଶ ବୁଝି ପାରିଛି। ଇନ୍ଦ୍ରାବତୀ ପ୍ରୋଜେକ୍ଟକୁ ନେଇ “ଜାଲ” ଓ ଦାଦନ ସମସ୍ୟା କୁ ନେଇ ‘ଦାଗ’ ଦୁଇଟି ଉପନ୍ୟାସ ପଶ୍ଚିମ ଓଡିଶାକୁ ନେଇ ଲେଖିବା ସମ୍ଭବ ହୋଇ ପାରିଛି ।
ସମକାଳରେ ଲେଖିଥିବା ନାରୀକବିଙ୍କ ବିଷୟରେ ମତ କଣ ?
ସମକାଳର ନାରୀକବି ମାନେ ବେଶ ଦୃଢ଼,ପ୍ରାଞ୍ଜଳ ଓ ସାହସୀ ।
କରୋନା ବେଶି ପ୍ରଭାବିତ କରିଛି ପ୍ରତି ଶ୍ରମିକଙ୍କ ଜୀବନକୁ । ଜଣେ ସାହିତ୍ୟିକ ରୂପେ ଏ ଘଟଣାକୁ କେମିତି ଦେଖୁଛନ୍ତି ?
ଯେତେବେଳେ ବି ଅସମୟ ଆସେ ତଳଶ୍ରେଣୀର ମଣିଷ ହିଁ ବେଶୀ ପ୍ରଭାବିତ ହୁଅନ୍ତି ।ଅନ୍ତତଃ ସମସ୍ତଙ୍କୁ କାମ ଓ ଖାଦ୍ୟର ସୁରକ୍ଷା ସମସ୍ତଙ୍କୁ ମିଳିବା ଉଚିତ । ଏତିକି କାମନା ।
ଆପଣଙ୍କର ଗୃହସ୍ଥୀ ଜୀବନ ଓ ଲେଖକୀୟ ଜୀବନକୁ କିପରି ଯୋଡନ୍ତି ?
ଦୁଇଟା ଯାକ କାମ ପାଖରୁ ମୋର ନିସ୍ତାର ନାହିଁ । ବେଶ ମାନସିକ ସ୍ତରରେ ଏହା ଭାବିନେଲେ ହେଲା। ଯୋଡିବା ମାନେ ଆଉ ତ ବେଲ ଅଠା , ତେନ୍ତୁଳି ମଞ୍ଜି ଦେଇ ଯୋଡିବା କଥା ତ ନୁହେଁ ନା !
